ગુજરાતમાં ચોમાસા પહેલાં જ હવામાનમાં મોટો પલટો જોવા મળ્યો છે. હવામાન વિભાગની આગાહી વચ્ચે રાજ્યના અનેક વિસ્તારોમાં મિની વાવાઝોડા જેવી સ્થિતિ સર્જાઈ હતી. અમદાવાદ સહિત ઉત્તર, મધ્ય અને પૂર્વ ગુજરાતના ઘણા જિલ્લાઓમાં ધૂળની ડમરીઓ, ગાજવીજ અને તોફાની પવન સાથે વરસાદ ખાબકતા જનજીવન પ્રભાવિત થયું હતું. gujarat weather alert today
દિવસભરની અસહ્ય ગરમી અને બફારા બાદ સાંજ પડતાં જ વાતાવરણમાં અચાનક ફેરફાર આવ્યો હતો. ભારે પવન અને વરસાદને કારણે અનેક વિસ્તારોમાં વૃક્ષો ધરાશાયી થયા, વીજ પુરવઠો ખોરવાયો અને કેટલાક માર્ગો પર વાહનવ્યવહાર પણ પ્રભાવિત થયો હતો. Gujarat Weather Alert
મહીસાગર જિલ્લામાં વાવાઝોડાની ભારે અસર
મહીસાગરના લુણાવાડા અને કડાણા વિસ્તારમાં મોડી રાત્રે આવેલા તોફાની પવનથી અનેક વૃક્ષો ધરાશાયી થયા હતા. એક સ્થળે રસ્તા પર વૃક્ષ પડતાં બાઈકચાલક ગંભીર રીતે ઇજાગ્રસ્ત થયો હતો, જેને સારવાર માટે હોસ્પિટલ ખસેડવામાં આવ્યો હતો.
અરવલ્લીમાં ધોધમાર વરસાદથી હાઈવે બ્લોક
અરવલ્લી જિલ્લામાં ગાજવીજ સાથે ભારે વરસાદ નોંધાયો હતો. ધનસુરા-મોડાસા હાઈવે પર વિશાળ વૃક્ષ ધરાશાયી થતાં વાહનવ્યવહાર અટકી ગયો હતો. પોલીસે અને સ્થાનિક તંત્રે ભારે મહેનત બાદ વૃક્ષ હટાવી ટ્રાફિક ફરી શરૂ કરાવ્યો હતો.
માલપુરની બગીચા સોસાયટીમાં વરસાદી પાણી ઘૂંટણ સુધી ભરાઈ જતાં રહેવાસીઓને મુશ્કેલીનો સામનો કરવો પડ્યો હતો.
સાબરકાંઠા અને છોટાઉદેપુરમાં અંધારપટ
સાબરકાંઠાના હિંમતનગર અને આસપાસના વિસ્તારોમાં તેજ પવન સાથે વરસાદ પડતાં વીજ લાઈનોને નુકસાન થયું હતું. જેના કારણે અનેક શહેરી અને ગ્રામ્ય વિસ્તારોમાં કલાકો સુધી વીજળી ગુલ રહી હતી.
છોટાઉદેપુર અને જેતપુર પાવી વિસ્તારમાં ધૂળની ડમરીઓને કારણે દૃશ્યતા ઘટી ગઈ હતી. અનેક સ્થળોએ વીજ પુરવઠો ખોરવાતા લોકો અંધારપટમાં રહ્યા હતા.
ગોધરામાં રસ્તાનું ધોવાણ
ગોધરાના આનંદનગર વિસ્તારમાં નિર્માણાધીન પુલ નજીક ભારે વરસાદના કારણે કામચલાઉ ડાયવર્ઝન રોડ પાણીમાં ધોવાઈ ગયો હતો. જેના કારણે વાહનચાલકોને વૈકલ્પિક માર્ગોનો ઉપયોગ કરવો પડ્યો હતો.
ખેડા જિલ્લામાં મિની વાવાઝોડું
નડિયાદ, મહેમદાવાદ, મહુધા, કઠલાલ, કપડવંજ, ડાકોર, ઠાસરા અને માતર સહિતના વિસ્તારોમાં ભારે પવન સાથે વરસાદ પડ્યો હતો.
માતર વિસ્તારમાં ધૂળની ડમરીઓ ઊડતાં લોકો ઘરોમાં રહેવા મજબૂર બન્યા હતા. ખંભાતમાં પણ વીજળીના કડાકા-ભડાકા સાથે તોફાની વરસાદ નોંધાયો હતો.
અમદાવાદ, ગાંધીનગર અને વડોદરામાં હવામાનનો પલટો
અમદાવાદ શહેરમાં મોડી રાત્રે ભારે પવન અને ધૂળની ડમરીઓના કારણે વાહનચાલકોને ભારે મુશ્કેલીનો સામનો કરવો પડ્યો હતો.
ગાંધીનગર જિલ્લાના માણસા તાલુકાના કાનપુર અને વાસણા ચૌધરી સહિતના ગામોમાં ગાજવીજ સાથે વરસાદ પડ્યો હતો.
વડોદરા શહેરમાં પણ વીજળીના પ્રચંડ કડાકા-ભડાકા અને તેજ પવન સાથે વરસાદી માહોલ જામ્યો હતો.
લોકોને ગરમીમાંથી રાહત, પણ તંત્રની તૈયારીઓ પર સવાલ
દાહોદના સંજેલી તાલુકામાં પણ તોફાની વરસાદ નોંધાયો હતો. આ વરસાદથી લોકોને ગરમી અને બફારાથી રાહત મળી છે, પરંતુ બીજી તરફ પ્રિ-મોન્સૂન કામગીરી અને વીજ પુરવઠાની વ્યવસ્થાની નબળાઈ પણ સામે આવી છે.
ચોમાસા પહેલાં જ આવેલા આ મિની વાવાઝોડાએ અનેક જિલ્લાઓમાં નુકસાન પહોંચાડ્યું છે. હવામાન વિભાગે આગામી દિવસોમાં પણ ગાજવીજ અને વરસાદની સંભાવના વ્યક્ત કરી હોવાથી નાગરિકોને સાવચેત રહેવાની સલાહ આપવામાં આવી છે.